zu unserem Youtube-Kanal

14.2.2018 Trauerrede zur Fasenachtsbeerdigung 2018

 

 

Trauerrede 14.2.2018

 

Liebe Fudiggl, liebe Anwesenden, liebe Trauergemeinde,

mir henn uns heid bei Köhlors versommld, um unsor Fasenachd 2018 zu beerdichä.

Doch bevor mor uns en dä trauriche Teil machä, losst uns nochemol korz Revue passiere, was mor so alles erlebt henn. Unn des war gar neddemohl so wenich… unn uhluschdig war’s a nedd!

Falls em Nochfolgende was fehlt, seht mor’s bittä noch, ich war a nedd immor uff de Hee!

Em 11.11.2017 isch uns die Fasenachd 2018 gschenkt worrä. Zur Gebordsfeior warä mor en Zeidorn bei de Woischlaich un Friends oiglade unn henn denne ihrän erschde Fasenachdsball befeijord. Hodd Schbass gmachd – unn’s Busfahrä hodd schunemol en erschde Oidruck gewwä, dass die Fasenachd 2018 richdich schee werrä kennd.

E Woch schbädor warä mor en Bermersbach, awwor des isch e onnors Kapidl!

Unsor Prowe sinn meischdens guuhd gloffä, a wennemol de Muli korzzeidich de Rabbl griggd hodd. Awwor simmor ehrlich, des isch a als guud nochzuvollziejä – bei unsorä Disziplin en de Prowä!

Awwor – mir henn uns all gfongä unn sinn voller Elan donn em 16. Dezembor quasi in unser Generelprohb gongä, wu mor en Kronä de Vera ihrä Hochzichd gfeiort henn! Do war donn schu absehbar, dass mor musikalisch uff de Heeh sinn. Ratzfatz hemmar do a e voriwworgejends Motto gfunnä: „Oifach roirufe, mir schbieles!“. Des war e scheens Feschd! Unn do simmor donn diregd vor de Schmuzzisch beim Ehdem oiglade worrä!

Im neie Johr hemmor donn fleissich weidorgebrohbd unn’s Musikalischä gfeschdichd, so dass mor rechd zuversichdlich in die Kompognä henn schdarde kennä.

 

Somsdahg, 20.1.

Em Somstag, dem 20.1. ging’s donn offiziell los: Prunksitzung enn Kerrloch. Mir fiehrä die gonz Baggaasch in’d Rheintalhall noi, wardä donn, bis des (bleed) Gebabbel rumisch, unn donn laafe mor widdor naus. Die Schdimmung isch subbor, awwor genau desweje buchd mor uns jo ah.

Donn kummt’s zu em Novum: mir machä e Musichersitzung im Foyer vunn de Rheintalhall. Gottseidonk wahrä mor uuhgschdärd – unn gschmaggd hodd’s fo vordä Toileddä ah iwworhaupt gar nedd! Weil’s donn nooch de Sitzung noch schee isch, bleiwe die meischde noch e bissl unn mir loddlä uff KiKaGe-Koschde noch e bissl was weg.

 

Somstag, e Woch schbädor (3.2.)

Em Somstag, de 3.2., schmingä mor bei Köhlors. Die henn en Wellness-Swingerclub uffgebaut, in dem bei 30 Grad und Klongschalätherapie jeder – jeden – schminkt.

Pünktlich hodd em Joggl soin Textilproduktions-, Im- und Export-Großkonzern a die Owwordaijl befloggd, die richdich schee worrä sinn! Joggl, e herzliches Dongschee dodefohr vunn uns all!

Zwischäzeiddlich deehdemor donn a bemergä, dass mor nedd vollschdendich sinn.

Frogdä Patrick: „Hodd der Inge Männorgribb?“
Säch’de Lars: „Unn Menschdruadsjohn!“
D‘Katrin: „Der hodd em Middwoch schu ohgfongä middem Mimimi!!“ DO WARS!
„Hajo, weje der korzzä Hossä!“ hoddd se gmohnd… „Demm friord doch’s Bimborlä oi!“

Hoffämor, dass des nedd bassiord isch, awwor uff jeden Fall war donn dohdemidd des Moddo geborä! Nedd blos, dassmor’s bei jedem Dreffä bschdimmd gfiehld 150x ghärd hädd – NOI, schbädors hemmor sogar en Mimimi-Kaschdä griggd! Awwor dodezuh schbädor nochä bissl mehnor.

Zum Offizielle:
1. Ufftritt: Prunksitzung Owwerhoisä – de Oimarsch war gonz schee turbulent, weil de Gloggegurd bricht, desweje wärdd ah de Oisatz verbasst, awwor iwwor‘s Freestylä kummemor doch noch zommä in de Brazil.

Dodefohr versaut’s diefä Blech de Sammor of 69.

De Sound schbielä mor zum erschde Mohl uff de Biehn, unsor Leischdung… naja, eh ordendlichä 3-4… oder so!

Zum Gligg isch’s denne Golos nedd so wichdich, wie’s musikalisch so isch – Hauptsach: laut + Schdimmung

D‘Karin haut’s vor lautor Schdimmung sogar um – wejem zu vielä Sekt oder weje zu wenich Sekt – vielleicht hodd’sie oifach e Elektrolytdefizit ghadd – des waijsmor nedd.

Nochem Ufftritt unn direkt noch vor dä Diehr unn a e paar Fremmä, wolle e paar soforrd zur Manöverkritik ohsetzä! Des wärd awwor vun mior direkt lautschdarg unnorbunnä – middem Verweis uff unsor Musichersitzung enn Kerrloch zwaij Wochä vorher!

Oonzich de Wichtelvorschdond derf sich beschwere, weil de Naij se beim Oilaafe umgebumbt hodd… awwor die Kloi vergisst nix, wärdder noch seje!

Mir fahrä also nach Wissedahl end Wogbachhall, die Schwongor bringt zwischäzeiddlich die Dormelich hohm.

De Katrin ihrän schbädorä Kommendar in de Wogbachhall war zwar zu was gonz onnerem, awwor der basst a gonz gut zum Ufftritt in Owworhausä: „Hauptsach bleed!“

Nooch 1,5 Schdundä Wardäzeit machä mor donn de Oimarsch – unn de Daniel schdeesd uff de Biehn… dezu.

Mit schbielä de Summer of 69 – unn’s diefe Blech versaut’s  zum 2. Mohl heid ohwed. Reschbekt!

Dodefohr leefd de Sound gonz gut! Die gonz Biehn hinnor uns räährt mit , so dass es e erschdi wohlichä Gänsehaut gibt. Des hodd richdich Schbaß gmachd!

Donn Ausmarsch ins Foyer mit altbekonndem Crescendo unn oimohl durch’s gsomde Programm.

Draußä kummd’s awwor doch zu em kloonä Zwischefall, weil de Neij leichd erbost isch – naja, eigendlich war der schdinksauor -, weil mor’s versäumt henn, ihm zu sachä, dass vor’s Foyer nedd blohs die vom Muli ohgsagdä Nohdä gebraucht werrä – sondern alle! Isch der wirriglich so jung, dass der uns nie selwor im Foyer ghäärd hodd? Des glaabd kohnor!

 

Sunndahg, e Woch vor Fasenachd unn

En Dahg schbädor geht’s also nach Kroonä uff unsorn erschdä Umzug.

Weil’s gschneit hodd, henn die Wäjelin d’Schneekette middgnummä.I bin donn awwor onnorweidich en moi Grenzä kumme: Scheiss-Gurt!

Nuja, immorhin war de Mimimi do donn a debaij, simmor schdolz – oimol, weilors iwworleebd hodd, unn weilors „Wick MediNait-Lob vors Mimimi“ ehrehalwor griggd.

Unsorn Ufftritt bei de Phoenix derf mor schun als reschd gudh glungä bedrachdä! De Silence war großardisch! Des hodd mir gfallä!

D‘Jenny hodd donn uff de Fahrt ins Razzebutz noch de offiziell Weddorberichd durchgewe: „Weddormeessich hemmor heidd a alles debai ghadd: Schnee, Rejä, Sunn…“

unn em sexä simmor all satt und henn bezahlt! Die Couch ruft…

 

Em 7.2. hemmor die ledschd Brohb vor de heiße Deehg…

… unn des Mimimi nimmd Faahrd uff!

Birgit: „Ich beohdrahg noch ä Fraa zum diefä Blech! Ich wärr do gmobbd!“
Do hebb ich schun gwissd: Achdung, ich zitier: „Des isch koon Ponyhof! Griegsch awwor en de Drauerreed ghuldichd!“

Hiermidd erledichd!

In derrä Brohb erfahrä mor donn a noch e bissl zu viel vun Kochs: mir hen grad de Easy Living gschbield ghadd, unn ich sag noch zu Inge, dassor sich middbewege soll.
Haut die Katrin raus: „Wie em Neschd!“

Unn donn hemmor all schnell hohm gmissd!

 

Schmuzzischor – 8. Februar

De Lars hodd heidd Gebordsdahg- de 21., 30. oder 51… mo waijs nedd so gnau!

Uff jeden Fall hoddor en de Bolandenschule em Foyer e scheens Kreendl grigd unn war donn „s‘schmuzzich Prinzessorlä“… hodd mir gfallä!

En de Bolondäschul wie immor RIESÄ-Schdimmung… un e Ausglassäheid wie ennerä Kloschderschul! Des machämor neggschd’s Johr onnorschd. Die Kinnor sollemol die Hall abfagglä! Mol gugge, ob unn wie mor des nohbringä…

Bei Köhlers en Kerrloch versuch ich donn, en Snickers uffzumachä unn wärr glei bleed vunn de Christina ohgmachd: „Griegschdesnedduff?“
Ich donn e bissl woinerlisch: „Machmidochneddoh… schunschd griegimoi Sach!“
Sechd die Katrin: „Des isch de Gebbärmuddaschleimhauddablösungseffegd“

Hewwi noch nie ghärd, willi a nimmi!

Do basst donn awwor a drodzem gonz gut, was de Lars kommendiord hodd: „Monn, isch des ein Gemimimi!“

 

Dodebaij hemmor‘s donn awwor sogar gschaffd, der Fasenachd 2017 zu huldichä!!
Sechd die Katrin: „Sven, de Mimimi hodd gschloofä!“
Sag ich: „Mimimi-Arscharsch…“
Kummt vum Lars: „… bitch!“
Donn de Ufftritt en de Schillerschul – mit Premjärä: UNS wärd gschbield, gsungä unn gedonzd – mir erinnerä uns: „wenn der Elefant in die Disco geht“. Schee! Donn rogge mir widdor die Schulhall.

Noch korzer Schdärgung im Lehrorzimmor fahrä mor nach Wiesloch zu unsorm Ufftritt bei MLP – bei strahlendem Sonnenschein – unn… midd vielä begeischdordä Menschä – unn… zu wenich Bior!

Zrigg in Wissedahl wärrä mor beim Edem midd Fleischkäs, Wärschdlin, Wegglin – unn donn noch Sohnetortt, unn Sliwowitz, midd Ramazzotti zugeballord!

Unn donn kummd’s dort a nochemohl zu einem Förschd, wie die Englennor sachä: s‘gibt e Betriebsratswahl – wejem ondauorndä Mobbing vun de Birgit!

Gwählt wärdd…d‘Inge. Herzlichän Gliggwunsch!

D‘Karin definiord glei mol soi Uffgawä: „Bisch du a offä vor Menschdruatzionsbeschwärdä?“

Vermutlich hodd sich diejenich gfraijd, die den Zeddel beim Inge noigschmissä hodd:

 

Mir schbielä än de Erzbergerschdrohs vorren begeischdordä Edhem unn soi Ilse, so dassmor vor’s neggschd Johr a schu widdor gesetzt sinn! Unn nedd blohs dess, mir griejä iwworraschend a noch hohen Besuch unn schbilä zu Ährä vun de Patrizia, dä Ärschdä!

Bei de AWO – gibt’s des Johr koi Berlinor, was de Aaron e bissl verwirrd unn vorärjort. Der hodd nemlich freschd demidd grechnd.

Unn em Seniorennachmittag – wie jedes Johr a widdor –hodd’s en Hauffä Leidd, die nix bessors zu du henn, als sich d’gonz Zeidd d’Ohrä zuzuhehwä…

Donn gehmor hohm, umziejä vorrem Lars soi Iwworaschungsparty! Iwworraschend isch dodebai awwor em meischde, dassmors datsechlich gschaffd henn, dass es e Iwworraschung bleibt! S’war dieMonedd devor e paar mohl knapp devor, awwor irgendwie isch’s immor gschlupft. De Lars hodd e bissl Schiss ghatt, wu er vorrem Hofdoohr vunn soine Leidd gschdonnä war, awwor es hodd sich rendiord, dass er sich noigetraut hodd! Des war e scheeni Iwworraschung unn en tolle Ufftakt zu em scheene Schlubml-Owed.

De Zwaidd hodd sisch zu demm Schlumblä nedd vorddgedraud, weilor sisch nedd vumm Topf gedraud hodd! Scheisse! J Hosch was verbasst, schee war’s!

 

Em 9.2., Freidahg, schmingä mor bei Jenny

Gwiddorwolgä em Horizont! Onscheinend henn zwaij Schlagwerker owehds e Kollission middenonnor ghadd. Ergebnis: e bissl diggä Lufd! Nuja, des kennä mor ja awwor gut genug, immorhin riechä jo faschd all Fazz a gern!

Die Gaschdgeworin hodd gfiehld zwaij Schdund em Schdigg gschmingd… unn nochämohl… unn nochämohl – bisorrä endlisch jemond gsaagdhodd, dassmor uffen Nachdumzuug gejä unn des gar konnor siehd!

Zwischäzeiddlich sitzt beim Lars e Schnäddorlä uffem Schohs, ge Karin?

De Krachor isch awwor de neijgweehldä Betriebsrat, der vunn soinerä Fraa enn Betriebsrats-Kummorkaschdä gschdriggd griggd hodd! Midd Schdifd- unn Zeddelhaldor! Sodass mor jedorzeit soford soi Vorschleeg odder a Beschwerdä – faschd anonym – hodd machä kennä! Des isch iwworaschendorweis a dadshächlich e paar Mohl gnutzt worrä! Härämor awwor noch!

Em Dreffpunkt enn Longäbriggä gibds leggor Buffet mit Bulleddä alla Cool, faschd wie hondgmachd! Unn Eiorliggär, der isch wirrrriglich hondgmachd – unn ratzfatz gsoffä! Wobei onschoinend irgendjemond zu korz kummä isch! Awwor zum Gligg gibt’s do jezzord a e Olaafschdell, wu mor sich beschwäre konn. Inge, wie lauded di offiziell Beschwärd?

 

Em Umzug duddld de Joggl e paar mohl newänaus, so dass’d Karin faschd bregglä muss… zum Gligg hoddses drin gebhaldä!

Donn isch de Umzug rum, awwor mior schbielä koin Uffdridd! E bissl konfuhs, allmiddänonnor!

E paar geje hohm (de Betriebsrat, die Aldä unn die midd Kinnor) unn e paar geje nommol ford – die erkennd mor Somsdahgs awwara glei!

Somsdahg, 10.2.

Bei uns enn Kerrloch wärdd ab de Achdä gschmingd. Im Vorfeld wädd idaljenisch gekochd. Donn wärdd Worschd grichd. Unn beim Schmingä Schoddlond befreid! Aktueller Beruf: Zimmormonn, geheime Berufung: Visaschist bei de Topmodels.

Nochem Schmingä hemmor Bromminenz zu Bsuch: Patrizia, die 1. und Daniela Diamond, Dragqueen Bitch.

En Kerrloch em Kreiz hodd koonor Ohdachd – unn grad als de Muli s’ledschde Liedl oizeehlä will, zeehld’Patrizia de Dreijor-Grundschlag oi – unn naus. Des Gsichd vum Muli war subbor!

Em Friedhof in Wissedahl schdelldmor feschd, dass d‘Mommä vun de Prinzessin Patrizia ihrä Inschdrumend en Kerrloch liejä glossd hodd! Irgendwie kummt’s donn doch enn Wissädahl oh – awwor enn Schaddä bleibd:

 

A wonnsisch des bewahrheided, dass ihrä Inschdrumend verrohmt war – gmobbd wärdse desweje nadierlich trotzdem…

Onschoinend hemmor noch jemond gmobbd, der sisch a hodd beschwere missä:

 

Bevor mor losfahrä henn mer nochen Zwischäfall – enn Sliviwitz-SubbborGAU. SCHU WIDDOR! Also die Petra, die muss fahrä… wie de Nicki Lauda oder so! Uff jeden Fall gild a do’d Aschormiddwochs-Regel, weshalb mor die Fußmaddä vum Seat auswringä unn des leggor Gsöff midd nach Eschdringä derf – des was hald noch iwwrich isch – unn midd e paar Broggä drin!

Donn fahrä mor endlich unn gmiedlich noch Eeschdringä. Uff de Fahrd wärdd iwworleegd, obmor uns nedd umbennä in Danny Diamond and the Drag Queen Bitches. Des wärdd awwor ziegisch vorworfä, was uns all erleischdord! Dodruf nochemol en Eiorliggär!

Enn Eeschdringä schdelldä Lars donn feschd, dass soin Schdeiss nedd nochgwachsä isch, nachdemmor’n leschd’s Johr nausgeglebbord hodd!

Donn simmor endlich do bei de Eldorn vum Holgor unn- jesses, sinn die Werschd noch derrä Fahrd so guhd!

Unn nedd blohs de heidich Rednor hodd dennä Wärschd zu verdongä, dassor de Umzug gonz hodd laafä kennä! Onnorä henn onnorä Bedengä ghadd:

 

Eschdringä isch e gonz hinnorriggs Pflaschdor!

’s kummt sogar zu Eiforsichdelaijä, als d Karin de Betriebsrat laufend odadschä dudd, demm soi Fraa awwor nedd de Vorschdand zuriggdadschä will! Was bsunnorschd de Vorschdand bekümmort…

 

De Umzug – verlääft ohne greeßerä Zwischäfell, wobei sich – vermutlich isch’s de Wichtelvorschdond – em Kummerkaschdä beschwerä muss:

 

Gonz zum Schluss schbielä mir noch e gloi bissl uffem Parrrigblazz, donn fahrä mor nach Wissädahl und fudderä beim Damir. Unn for laudor schnellschnell, gibds sogar neddemohl en Slivovitz! Denn henn die Schlumblor sich donn schbädor uffem Weg vunn de Leipzicher Schdrohs in de Wissedählor Hof noch schnell ghohld.

Unn em Wissedählor Hof schdellämor feschd, dass es heidd en scheene Umzug war – trotz Menschdruatzionsbeschwärdä!

Irgendjemond beschwert sich noch beim Betriebsrat:

unn donn geje irgendwonn die Lichdor aus.

 

Sunndahg, 11.2.

Mir schmingä widdor bei uns – unn d’Petra schidd schun widdor de Slivowitz in ihren Seat!

D’Petra war en Dahg voher iwwrichens noch korz oikaafe, weil mor noch Nochschub gebraucht henn. Schdolz gibdsimor also die zwaij beschdellde Beschor Sahne unn guggt mi voller Fraijd oh! Uff die Frohg, wu die Eijor sinn, fälldorä korz s’Gsichd nunnor! Owwor dess hemmor glei gegläärd, die Nochborschafdshilf enn Kerrloch funktioniort!

Während dem Schmingä hodd mor de Oidruck, morwär innorä Induschdriekich – do werrä Wegglin gebaggä unn Eiorlikär gekochd, das grad grachd!

Vum Schbeidor waijs konnor wuer hoggd, der versäumt heidd’s Schmingä, dodefohr schmeggd soi Worschd leggor – bis’ze gfressä isch!

Ferddisch gschmingd sitzä mor noch e weil rum. Währenddessä wolld de Patrick de Deggl vun de Worschdbix wegduuh unn hodd e neiji Schbezjalidähd kreiord: kaldgfächldi Lewworworschd.

D’Birgit bringd donn den Dahg uffs rechde Nivoh: „Mensch heb ich e Fasenachd! Menschruier wie enn Depp unn de Zoh fliegt mo naus!“

Iwwor de Hombriggor Umzug saachi nix, der war bleed – wie jed’s Johr! Do solldemor uns e Aldernadiv iwworleje.

Erwähnenswärd isch eigendlich blohs die Tadsach, dass de Schbeidor Bsuch griggt hodd vun vior Ewwor! „Was heeden machä sollä“ wärd schbädor soim Medl zugschbrochä… dassor nedd ausem Neschd gegrochä unn liewor liejegebliwwä isch, des isch e Frechheid! Unn du brauchsch jezd a gar nedd mimimierä weje Ohräschmerzä oddor sowas! Bisch hald e wissedehla Memme! Awwor vielleicht hodd Daniela Diamond ja oifach a ihre Sach ghadd unn sich nedd getraut! Debaij war des jo dess Johr bei gfiehlt de Hälft vun unsere Medels de Fall…

Zohrlos fahrämor donn schbädors nach Zeidorn unn rogge dort erschdor de Umzug und donn noch de Feijorwehrblazz. Donn riggä mor ab unn schbielä en de Bushaldeschdell blohs vor uns – unn die, wu’s härä wolle.

De Joggl schickt sogar e Ohwohnerin hohm – zum Schbarglschdechä!

Unn donn riggä mor ab.

Dehohm fallä mor noch bei de Birrriggidd en de Kellorbar oi unn sinn uns em neggschde Dahg oinich, dass de Maachä ausschließlich weje dem Bärlauch-Dip verdorwä war… des konn nix onnors gwessd soi! Bärlauch isch a e hinnorigsi Sach!

 

Rosemondahg, 12.2.

De Dahg beginnt midd… Schneefall – faschd wie in de Albä!

Donn Schmingä bei Dörrs unn‘d Tanja (Braun) bringd e Gschenk vors Uwe mit: e mobils Dixi.

D‘Jenny hodds en de Blohs unn’d Inge hodd Menschdruatzionsbeschwärdä. Nedd, dass des ohschdeggend isch!?

D‘Jenny isch donn doch debaij, nachdem se schätzungsweis 14 Liddor durchgschbield hodd. Isch halt e Kerrlochorn, do wärd nedd Rumgmimimied…

D‘Busfahrt nach Odenä verlaaft unschbegtakulär. Beim Aussteijä hemmor en Owerhaisar Pelzor debei unn donn geht’s enn’d Uffstellung.

Dordd hodds donn alles: Veschbor-Biffee, Sunn, Lichtschutzfaktor 30, Hochwasser, Lawinengefahr Stufe 5, Slivo on the Rocks – nix, wasses nedd gewwä hädd!

So longsom mergdmor derrä Fasenachd a ihr Aldor oh. Sie wärd des oi oder onnor mohl a schu e bissl störrisch, unnor onnerem direkt uff de Umzugsschdreck, als de Ärschd so richdig onoor naushaud unn uhgmiedlich wärrd. Es soll nedd’s leschde mohl en dem Dahg gwest soi!

Nochem Umzug monschdorä mor midd de Gutzbachkacke, die Bärämadl verweigorä – die kenne nimmi – die Mimimis!

Zu guudor Ledschd rennä mor donn en uhgmiedlichä Halbmarathon zum Bus, der a noch korz vor Kroonä parrigd!!!

Unn als‘d Herrgottsdrummlor uffghärt henn zu drummlä… hodds widdor gschneid!

Em Bus erfahr ich, dass moi Fraa unner’m Bloosä faschd de Schdopfä verlorä hädd, deshalb isch sie Zickzack gloffä. Dongschee, Birgit, vor des tolle Bild! Bin’s nimmi los worrä…

Em Poseidon lossde Ärschd die Siduatzion middä Wärddin eskalierä, saichdorä enn de Vorgaardä unn rennt wutentbronnt defu. Hauptsach, er losst’Schlissl do! Ge, Karin?

Awwor onschoinend war soi Owedessä nedd’s Schlechdeschdä! Wie hoddor gsagt: „Je diggor de Hals, desto bessor‘s Fressä!“

 

Schbädors dreffä mor uns zum Schlumblä beim Klaus en soinerä Garaasch. Schee wärd’s, abgsee dodefu, dass der Knowwlich und des Bior Kärworfunktionä middsich bringt, die zum Daijhl beängschdigend warä.

Em zwölfä singämor de Tanja e Burtsdahgsschdändorlä unn losse uns Jackie-Cola schmegge, während mor de Song of Silence middgröhlä.

Im Wissedähler Hof isch’s also aah rechd schee – bis’d Marion de Fingor gebrochä griggd. Awwor gmimimid wärd nedd! Isch haldmiddlorwaijl a schun long enn Kerrloch!

 

Fasnachts-Dienschdahg, 13.2.

Heiddemorjäd isch’s Uffschde e bissl härdor als sunschd. Awwor mir dreffä uns en Wissedahl bei de Tanja zum Schmingä – unn e bissl Bordsdahgsgedehs.

Iwwor’s Sälzlors laafä mor en’d Uffschdellung unn fiehrä de Wissedehlä Umzug als Nummor Oons oh – des kommor jo a sunschd konnor haijsä!

Semtliche Befürchdungä im Vorfeld henn sich riggbliggend zerschlachä – em schlimmschde isch des ohnä Wäjele neewenaus – was awwor alle Drummlor gfraijt hodd – unn de Neij, der awwor sowieso nedd so richdich middgeblohse hodd. Der hodd meischdens liewor soi Noodä sordiord…

Em Frongg schbielämor geje Schluss aah noch e Privaadkonzärd unn de Joggl stellt nochem offizielle Pflischdbrogromm feschd: „So inkontinent… äh, konzentriert simmor noch koon Wissädähler Umzug gloffä! Bin richtig schdolz…“

Uff de Schdreck hodd d‘Marion nemlich faschd die Schwongor umgrennd, als sie uffs Klo grennt isch… jemond onners beschwerd sich schrifdlich beim Betriebsrat:

 

Unn donn hoggä mor en de Hundehall em Freiä, babble so dies unn das – unnor onnerem wärd a thematisiert, ob mor nedd a en onnore Umzug schbiele khendä:

 

Donn loddlä mor Reschde leer, bis mor em korz noch dä värddl Fünfä en d Hall noilaafä, korz schbielä unn donn abrigge.

Iwwor’d Schitzähall, wumor’s schwere Gerät verschdaue, laafämor in de Reichsadlor zum Owedesse. E paar Unkabuddbaare geje direkt in’d Schrohsefasenachd.

Abschließend schlache nochepaar bei de Tanja uff, unn donn sinn die meischde schbeedeschdens em Achdä dehohm. Awwor a des Johr gibt’s noch veroonzld Schdadusmeldungä vunn de Gass – bis donn em Middornachdt (endlich?) enn Wissedahl s’Feior brennd.

 

Was bleibt?

D‘Petra tritt a des Johr nedd aus, weil se viel zu viel Schbass ghadd unn a gmachd hodd. So derf des gern weiddorgeje – awwor des middem Leesä unn des Fahrä middem Slivovitz – des ihwämor nochemol. Vielleicht brauchd die oifach s’rechde Werrrigzeig vor die Brrrrie! Mol de Kassieror frochä!

Des Mimimimierä muss uffhehrä… des wärd oifach zu arrig! – Unn des Menschdruiehrä ah!

Zohersatz isch wichdich, kimmor’d eich drum!

Die Fussl ausem Koschdiem wärd kohnor vermissä!

S’beschdä Schlagwerk henn mior! Ob do die Muschgl dichd machä oddor e Woch vorher noch en Tennisarm isch… des isch graad egal – weidorgschbield wärdd! Vorrem Umzug en de Uffschdellung… ob do Bollorweje sinn oder nedd – weidorgschbield wärd! Unn a wenn de Umzug schu long rum isch… weidorgschbield wärdd!

Zu unsorm Gebleehs – sensatzionell! Ah wonn der Herpes juggt unn die Gosch vollor Bloohsä isch… do wärd a weidornoigrohrd, bis de Drichdor gliehd! Schee!

Schee war a die Värsorjungssituatzion en de Umzieg! So oft hebb ich noch nedd verweigort! Moi Notfallratzion em Wejelä hewwi des Johr nedd wirriglich gebrauchd, weil ihr immor gloffä kummä seid! Sauguuhd! Des derf s’neggschd Johr grad widdor so soi, do hodd koonor was degeje!

De Mimimi-Kummorkaschdä hod nedd blohs bleedä Idejä, sondorn a e paar gescheidä, iwwor die mor abschdimme missä – awwor nedd heid. Trotzdem, dassmors ghärd henn:

 

Vermudlich sinnmior die onzigschd Guggemusich uff dere Ärd midd Betriebsrat! Sensatzionell!

Oohns isch klar: mir sinn alle Heldä! So oft wie mior schdeil gongä sinn…

Wobei – die eigendlich Herausforderung liegt jezzord sowieso wu onorschd: bis mor die Keesfiehs los isch, die gonz Droggefaarb aus semdlichä Ritzä hodd un dehohm widdor Normalzuschdond herrschd, wärd wahrschoinlich Oschdorn soi! Awwor vermutlich wärd mor do aah noch e paar Fasenachdsgimmicks finnä – Gutsl, Murmlä, Eiorliggärbeschor oder so… lossemor uns mol iwworraschä!

Solong mor jeweils di beschd‘Ehefraa vun allenä dehohm henn, gehd doo aah nix schief! Dongschee on allä Medels!

E bsunnors Lob missämor all noch zwaij bsunnerä Medels ausschbreche, ohne die des alles so garnedd geje deed:

Liebe Marion, ohne doi Orga-Talent heedemor erschd garkoi Ufftridd – unn Gabi, ohne diich deedemor all vorhungorä unn vordoschdä! E bsunnors Dongschee deshalb on eich zwaij!

 

Die Kampagne war mol widdor korz – je nachdem, wen mor frogt: zu korz oddor nedd korz genug oder viel zu korz oder a gar nedd. Wer waijs des schu?

 

Liwi Fasenachd 2018 – Du warsch toll!

Mir henn viel klassä Ufftridd gschbield, henn viel Schbahs middänonnor ghadd un ah oft glacht – unn midd Sicherheid werrä die neggschde Dehg unn Wochä nochepaar Erinnerungä bringä, diemor akduell so gar nimmi parat hodd.

Donn werrd sich jedor vun uns on die schee Kompognä erinnorä unn midd Wehmud droh dengä, dass die Fasenachd 2018 nimmi isch!

 

LIED

Liwi Fasenachd 2018 – ruhe in Frieden!

PROST

Gottseidonk bleibd uns allenä awwor die Gewissheid, dass noch de Fasenachd vordä Fasenachd isch! Unn deshalb fraijh ich mich a schu uff die neij Kampagne – die em neggschde Johr e bissl längor isch als sunschd!

Dengd droh: d‘neggschd Brohb isch neggschd Woche em Middwoch, donn geht’s uff die Fasenachd 2019 zu.

Amen.

 

Addendum

Unn nooch de Redd henn donn noch zwaij Gaijsä gmohnd, sie miehsdä de Graabrednor schmiggä – nur weilor sischorschdellä wolld, dass die zwaij eh schun geblohgdä Schlagzeijor a die neggschde zwaij Dahg noch midddu kennä! Awwor des kapierä die nedd! Nuja, was machdmor nedd alles vorrän Scheiss midd… :-)

empfehlen via

Kommentar verfassen

nicht das richtige gefunden? hier kannst du gezielt suchen:

Do NOT follow this link or you will be banned from the site!