5.3.2025 Fasnachtsbeerdigung

Liebe Anwesende, liewe Fudiggl, liewe Fasenachdor, liewi Trauergemeinde,

heidd Nachd em Zwölfä isch unser Fasenachd 2025 vunn uns gongä. Mir wolle in alder Tradition heidd Ohwend vorräm Fuuhdor korz zrickbliggä unn enn de neggschde 1-1,5 Schdund nochemohl e paar scheene Momendä an die diesjährich Kampagne erinnorä.

Em Novembor leschdes Johr hodd die Kompognä gschdarded – midd unsorm Prowäwocheend en Bermersbach. Des kenndor em Bericht nochlese, was do so alles bassiord isch, do gejemor heidd nedd weidors druff oi.

‚d Uffdridd unn Umziehg senn donn em Januar losgongä. Der erschd em 26.1. enn Malsch bei Karlsruh.
Unn allda, des brauchd’s nedd nochemohl: Midde en de Nachd! Midde en de Nachd uffschdeh – unn Schdundä vorrem Sunneuffgang unnorwegs zum Schmingä! Was e Tortur! Unn des, weil der Umzug dord em 11:11 Uhr ohfängd – ich sahgs gern nochemohl: em 11:11 Uhr! Die senn doch beglobbd! Nochdehmmor ca. 8 km en’d Uffschdellung gloffä seinn, gejemor donn endlich em Värdl noch Ohns (!), also gonzä zwahij Schdund schbädor, a endlich uffd Gass. Isch saukalt, awwor bei viel Sunn wirkt unsor neijs Koschdiehm dodahl großaardisch! Richdich schee!

Em Freidahg, de 31., geht’s em Dunglä nach Reilingä zu unsorm erschde Nachdumzug, wumor nochem Umzug nedd genug henn unn de Muli midde Posaunä ohfengd, de Wackeldackel oizuschbielä – unn d’Fe sich middäm Basschlag blohgd!

Em Pfarrfasching e Woch schbädor semmor de Oimarsch unn henn e Weltpremiär: d’Lady Gaga ’s erschde Mohl live – unn garned mohl schlechd!
Em Ohschluhs referiert d’Karin em Foyer e halwe Schdund iwwos Owwahaisa Käsbrotbrot und dass es ohne’s Owwerhaisa Käsbrotbrot koi Owwahaisa Käsbrotbrot isch. Des Owwahaisa Käsbrotbrot hodd awwar drodsdehm guhd gschmeggd, a ohne’s Owwahaisa Käsbrotbrot!

Enn Dahg schbädor semmor Somsdahgs enn Kerrloch unn sorge dord uff de Brunksidsung a nochemohl vorrä weijdorä Weltpremiär: mir schbiele nedd uff de Biehn, sondern vunn de Dribiehn runnor unn beschallä d’Rheintalhall emol brachial vun de Saijd! Effdor mohl was Naijs! War e guuhdi Idee vor uns, a wonn’s for die, wu oigloffä senn, vielleicht e bissl komisch war. Konn uns jo awwor egahl soi! Mir henn abglifford.

Sunndags semmor donn en Brusl, wo uns de Vincent und soin Bruhdor faschd unsor Biffee leergfuddord henn, was jo awwor gar nedd soi konn – bei denne Mengä vunn Kasslor, Worschd, Kees unn Gmiehs, diemor immor debaij henn!
De Umzug selwor war schee, widdor viel Sunn unn mir wahrä die Scheendschdä! Deshalb waarämor a Mondahgs enn de BNN direkd uff de Tiddlseijd abgebildt!

Donn hodd’s die neijä Tourshirts gewwä unn die Woch druff isch widdor was Neijs bassiord: mir henn e gonzes Wochäend frei! Aldor, wu kummamor donn do noh!? Des isch schun faschd skandalös. Awwor schee war des a emohl, so zwahij freije Deehg.

Do hodd donn in de Zwischezeidd die Lilly beschlossä, dass es jezzord mohl Zeit vorsi wär unn isch em Dunnorschdahg, de zwonzigschd, gschlupfd! Herzlichen Glückwunsch on derrä Schdell de Mama Alisa unnem Babbä Lars – sowie de Ohma Petra! Mir frahijä uns sehr, dass alles gut geglabbd hodd unn’s Eich guhd gehd unn des Klohnä wechsd unn gedaijd!

Somsdahgs semmor donn logischerweis ohne’d Alisa unn de Lars enn Wissedahl, wumor’d Prunksitzung ereffne. Unn schbädor’s, nachdemmor em Binderaum die Zwischezeidd iwworbriggd hen, schbiele mor en Owworhausä s‘Finale vun denne ihrä Jubiläumsprunksitzung. 125 Johr Owworhaisor Nasskabbä – bzw. Tornvoroi – unn mir debaij middorem iwworragende Uffdridd, dehnmor sogar em Fernsehen unn uff YouTube bewunnorä konn – unn wu de Muli de Ährävorschdand uffdä Biehn abgrädschd!

Sunndahgs war donn Wunde legge ohgsagd… bevormor abbem Schmuzzich unsor diesjährichs Programm reduziert henn, weilmor selwor reduziert waarä! Die Schwongorschafdä waarä ohschdeggend unn e paar senn liewor en de Urlaub gongä, statt dehohm die Fasenacht zu feijorä! Verräädor!

Emm Schmuzziche schbiele mor also leicht reduziord awwor sunschd wie jedes Johr die Bolondä- unn Schillerschul, bevor mor en Wiesloch bei de MLP schbiele unn dort leggor Grillworschd fuddorä unn Bior loddlä.

Dennohch semmor en de AWO en Wissedahl, wu’s abgeloffenes Bior gibbd, gerüchteweis aussem voriche Jahrdausänd, bevormor donn en de Volksbank en Kerrloch de Abschluss machä.

Freitag: Nachtumzug en Longebrigge, d‘Rewe hodd ah zuu ghadd, de Aaron war noch nedd debai, isch nix groß passiert! Aussor a do e Weltpremiär: mir schbielä NEDD uffem Kraisl. Hodd’s a noch nedd gewwä!

Somsdahgs unn sunndahgs hemmor donn Unterstützung vum Aaron, der’s Wäjeli ziehd.

Und abbem Umzug en Eschdringä hemmor donn a unsorn aijene Tourbus, mit dem uns de weltbescht Busfahror Bernhard durch unsor Welttournee fährd.

Mir laafe also en’d Uffschdellung unn nach wie immer viel Veschbor unn so geht’s los. Als mor uffd Gass geje, also loslaafä, froghd Petra: „senn miar die ledschd Numma?“
„Noi, warum?“
„Weil hinner uns die Kehrmaschine isch!“
Ich loss des oifach mohl so schdeh…

De Umzug selwor bleibd droggä, also weddormeesig, unn bis uff de Uffdridd on de Kärch, wu uns en halbvollä jungä Dreggsagg Flasche aussem Wäjeli klaue will, vumm Patrick aber höflicherweise uff de Gehweg eskortiert wird unn’s dort vor Glasschbliddor nur so wuchord, recht erwartungsgemäß. Unn ja, des isch en korregde deitschä Satz!
Erwartungsgemäß isch‘s, bismor uns on de Uffschdiehg zum Schbordblazz machä. Dord schbielämor uff de Gass schbondohn mit dennä Tonnä und Teile vunn de Eselsgugge d’Cordula unn de Guggämarsch. Unn owwä uffem Berg schbielä mor donn ah noch midd denne ihräm Gebläs. Schee war des!

Sunndahgs wärd en Durlach de Wackeldackel „voll toll“ neij innorbrediord und leeft donn schdundelong iwwor’s morjeds rebariordä Megaphon, bis mor ohwends noch enn schbondohnä Gebordsdahgsuffdridd schbielä, bevor e paar wenichä sich em Schizzähaus noch e paar Schnidzl noiziehjä.

Em Mondahg dreffämor uns widdor zum gemoinsame Schmingä und werrä midd Essensmengä bombardijord, weil die Wissedalä Fasnachtsgrupp e bissl was iwwrich hodd!
Drodsdehm hohld‘ Karin noch e Tonn Schnitzelwegg vumm Globus, dass mor en Odenä faschd en Verkaafsschdond heddä uffmachä kennä!

Uffschdellung schdressfrei, nedd gschbield bissmor uff de Gass sinn. Awwor donn: Vollgas uff de gonzä Schdregg.
Unn vorräm Aldorsheim erfahrä mor, dass es de Ährävorschdand heidd morjed schun erledichd hodd unn’s desweje de Karin em Riggä weh dudd… ich hoff, des hodd sich widdor gewwä!

Donn gibbd’s Pizza em Binderaum, bevor mor uns enn’d Parolebar uffmache unn die noch kurzerhond abreissä.

Em Dinnschdahg sinn unnor onnorem de Muli un’d Organisatorin raus. De Muli hodd’s uff de Pungd gebrochd: weilor „heute in der Nähe eines Klos sein möchte“. Wassisch doh blohs bassiord? Gerüchteweis war’s ohgeblich die Pizza, awwor vormuhdlich warres doch die vielä Pfeffis und Seggdlin unn so…

Mir geje also em Fasenachdsdinschsahg s’ledschde Mohl zum Schminggä unn erfahre, dass de Joggl besessä isch – vum Wackelkontakt – unn geschdern middl en de Nachd em Schlohf hochgfahre isch unn ehwe denn gepfiffä hodd! Oifach so, middl in de Nachd im Tiefschlaf! D’Karin hodd sich beim Erzeehle ausgschidd vor Lachä… s‘war schee, awwor eigentlich isch des e bissl erschreckend, Joggl!

Weil de Schwetzingormor Umzug mohndahgs korzfrischdich abgsahgd worrä isch, gehjämor schbähdor wie in aldor Manior en Wissedahl uff’d Gass. Hot blohs ’s Lewworworschdbrohd vumm Bernd unn de Slivo vumm Robert gfehld – unn hald e paar dausend Menschä.
Dohdefor war’s em Mayer Rolf soinorä Schdrohndbahr richdich schee unn de Aperol sehr gelungen, bevormor donn enn de Parrrigg senn! Hodd e bissl längor gedaujord, weil’d Peetra mit ihrem Fessl Aperol faschd nedd ohinig worrä isch! Em Parrigg war‘s e bissl wie friehjor em Wissedehlä Umzug. Grigg i sogar e bissl Genshaud…
Donn schnell nochemohl enn’d Parolebar unn guhd isch’s for des Johr middä Fasenachd…

Alla, unn heid semmor do, em Baby Luna – henn korz zrigggebliggd uff e scheeni Kampagne, in derrä mohl widdor rechd viel bassiord isch.

Unn jetzt erhebt Eich biddä und lossd uns innorä Schweigeminudd unsorä verschdorwenä Fasenachd 2025 gedengä.

Abschiedslied

Enn de neehgschdä Dahg oddor Wochä schdelli die Bilder unn Videos uff unsor Homepage, donn kenndor dord jederzeit in Erinnerungä schwelgä. Unn Eich a schu druff frahijä, dassmor enn 247 Dahg schu widdor nach Bermersbach geje unn enn 344 Dahg widdor de Schmuzzich isch.

Bleibd oddor wärd all gsund unn enn zwahij Wochä hemmor Genoralvorsommlung. Richt’s Eich all oi. Isch wichdich!

Gudd Nachd unn jezzord en guuhde Abbedidd!

Dongschee