26.2.2020 Fasenachtsbeerdigung

Liebe ohwesende Trauergemeinde, liewe Fudiggl,

es isch emohl widdor soweit: gschunnenä Fiehs, Libbä midd Schbonnung wie e LKW-Abschlebbsaihjl unn Owworärm wie Preisboxer; em gonze Haus isch iwworall Gliddor vordaijld, schwarze Farbgleggsor en de Wänd unn vorrän Sliwowitz muss mor sich zwischezeitlich aah iwworwindä!

Donn isch klar: die Fasenachd – sie isch dohd!

Om geschdrichä Dienschdahg Ohwed hodd sie uns em Middornachd vorlossä unn isch vun uns gongä.

Sie war e meewiescheenie unn e großaardischi!

Nedd blohs, dassmor ohni vunn denne zwaij Herzdohme aus unsorrä Raaihjä gschdelld henn, mirr henn iwworraagend performd – faschd iwworall, awwor des sejemor glei…!

Enn korze Iwworblick, Details kenndor nochleesä!

Ohgfongä hemmor eigentlich schun em ledschde Johr en Rhoihausä, wumor gholfä henn, die Tullahall final abzureissä!

Em Januar semmor donn erschdämol en dä Narrägoddesdienschd. Dort donzämor zu de Forlebuzzel unn sinn donn ohschließend bei de Lisa unnem Schbeidor, um schbädors vum Joggl zu erfahrä, dass soin Buu immor blohs Bezijungä ghadd hodd, die nedd längor als 8 Dahg gonge senn. 8 Dahg, in dennä der arm Kerl, also de Jodd, gonze Haisor gebaut oddor renoviert hodd!

Donn semmor e Woch schbädor a schun uff unsorm erschdä Umzug en Reilingä, en Nachtumzug. Unsor erschdi Bassdromml isch nedd debaij gwesd, awwor de Holger unn de Inge machä ihrä Sach ordentlich, zumindeschd nedd schlechter als s’Bloswerk, des wie jeeds Johr aah erschd noch zommäfinnä muss.

Vor de Hall kummds zur Eskalation – awwor nedd wie d’Carina dess iiblicherweis mohnd, sondern bleed – wejem Jackie Cola.

In de noochfolgendä Brohb kummd’s zur Ausschbrooch, dass des nimmie bassiord, was donn a tatsechlich nimmi de Fall soi wärd.

Em Philippsburjor Narräschbrung bassämor unser Performance uff de Gass de Zuschauor oh. Dodefohr roggemor di Hall! Und yes – alle performä richdich guuhd!

Donn wärds kurios.

En de Brohb – en de Brohb! – beweje sich uff oimohl unsor Bläser! Unn zwar all! Sogar de Joggl moved soin Aschdralkäärwor enn de Schizzähall unnä! DES hodd’s noch nie gewe…

Bis en Durlach, awwor dodezu kommd schbäder noch was.

Zwischedurch nominiert d’Marion „Jackie Cola“ zum Unwort der Kampagne unn em 8tä Februar semmor uff de Prunksitzung en Eeschdringä. Unn wie immer isch die Eerschd kurios: de Joggl bläst faschd in Ultraschall unn Zack! hemmor unsorn erschdä Jamba-Klingelton! Denn mussi a mol noch raus machä…

Ohschließend fahrämor nooch Hombriggä unn erlewä e Oidrittsfiasko, was’d Petra em Nochgong jedoch middem HCC rückwirrgend unn vor’s zukinfdich klärä konn. Dongschee!

Uff jeden Fall gehd en dem Ohwed de Lars weje soim Gebortsdahg schdeil unn alle geje midd. Dongschee unsorm Taxi Celine, die uns neddorweis hohmgfahrä hodd! Des war wichdich…

E Woch schbädor begleidä mor unsor Herzdohm enn Wissädal en de Prunksitzung beim Oizug, zindä gfieldä 50 Tonnä Konfettikanonä und senn de-nooch in Owworhausä widdor mol legendär. Oddor wie’s d’Orga formuliert hodd: „grandios di Hall‘ groggd“

En Dahg schbehdor hemmor en Krunä traumhafds Weddor unn unzählichä Menschä säumä d‘ Schdrohsä.

Donn hemmor noch en grandiosä Ufftritt bei de Phoenix inkl. Schdand-Oilaag vunnorä Zuschauorin. Denohch senn die ohnä essä gongä unn waarä em Sechsä schu middem Nochdisch ferrdich, unn die onnorä senn en’d Wärdschafd. Nooch „nur“ zwaij Schdund henn donn a alle onnorä endlich ihrä Essä ghadd!

Em Schmuzzichä geht’s schon wieder los! Di eerschd Flasch Sekt isch ratzfatz gsoffä, noch vordä 10ä.

Donn kriegt de Adi anale Ambitionä (Anm. d. Verf.: korrekterweise „anale Randale“), die er de gonz Daahg mit sich rumdrächd unn erschd em Pfarrsaal loswärdd.

Donn marschierämor oi in die Bolandeschul. Ein absolutes First: Katrin und ich schaffes tatsächlich, die Kinnor zum Bewejä zu animiere unn die laafä hinnor de Katrin e Polonaise. Zum allererschdä Mohl donzä nedd blohs die Gardämeedel, sondern ah die Kinner! Schee!

De Uffdridd enn de Schillerschul zeigt, dass es ohne Absprachä zwar aa geht, awwer nur mit Gschraij während dem Ufftritt.

Nooch zwahij recht kuriosä Performances fahrämor zur MLP: do schbielemor recht passabel, eigentlich ziemlich geil unn ohschliessend gibd’s beschdä Grillwärschd inkl. Dekolltää-Vollvorscheenerung beim Kassior.

Enn Wissedal em Friedhof fehlt donn ohnor, weilor Heimscheissä muss!
Lars zu Inge: so konnschemohl zeijä, was konnsch!
Inge: Wieso? Isch de Holger nedd do?
Sven: Der Holger isch doch die gonz Zeit hinnor mior gfahrä!
Marion: Hä, der isch hoohm.
Sven: Was machä?
Adi + Sven – gleichzeitig: Heimscheissä?

Was unsorn erschdä Vorschdand kommentiert midd: „Heimscheissä konn koi Argument soi!“

Keend‘ aah en Tishört-Schbruch soi…

Em Jakob-Giesser-Haus hemmor also de erschdä Ausfall zu verzeichnä, s’isch awwor nedd de Holgor, sondern de Patrick, weil dem soi 1.000er Ibu nimmi haldä. Desweje gehdor hohm unn verbasst sogar s’Schlumblä en dem Ohwed. Hodd’s glaab a noch nedd gewe!

Während dem Ufftritt mach ich enn Steer Feijorholz unn donn dringä e paar noch was Leggores, ge Marion und Tanja, so enn Jägermeischdor isch oifach was Guhds!?

Unn dreehdä donn bei dennä uff, die immer wenichor werrä – Zitat: „mir werrä immä wenichä, s’sterrwä halt immer meenä!“
Ja, genau so gehd Schbaahs!!!
Alles in allem isch der Uffdridd wie in de vergongenä Johrä aah dess Johr e bissl gonz arrig iwworflissich.

Dodefohr machd’Orga dord die Prunksitzung in Wissädal vors neggschde Johr glei klar! War’s doch for was gut…

Donn dabbämor zur AWO. Dort gibts Noochschub: e frischi Trompeed, weil’s d’Carina wenigschdens vorr DEN Uftritt gschafft hodd. De Joggl bläst sich de Monschdorherpes noo und stellt aah noch e Bild defuh enn’d Grupp… na dongscheeh! So eklich…

Ohweds treffe mor uns zum Schlumblä enn Wissedal unn geje schdeil, aah wonn sich d‘ Tanja ihrä Fiehs ausnohmsweis mol nedd midd Latschekiefor oigriwwä hodd! Monchmol erfährtmor Sachä, die senn oifach zu arrig…

Die Nacht isch für egal wen zu schnell rum unn em Freidahg Morjä glei di erschde Schocknochricht: de Holger muss heid aussetzä, er schiebt’s uffs Knie, awwor auch er war midd Schlumblä…

Enn Longäbriggä veschborämor e Mehrgängemenu. Sogar Fisch gibbd’s. Donn hemmor en tolle Umzug, schbielä uffem Kreisverkehr unn veschporä ohschließend nochemohl uffem Rewe-Parkplatz.

A propos Veschbor: a des Johr widdor e Wahnsinns-Engagement vunn de Gabi, die immor so rechdzeidich oikaafe war, dass’d Rewe noch nedd zu ghadd hodd…

Donn roggämor de Wissädälor Hof – awwor wie! Midd oim Wort: legendär!

Somsdahgs isch’s enn Kerrloch em Kreiz e bissl bscheidä, awwor wenigschdens isch’s Weddor guhd.

Donn fahrämor middem Bus nach Eeschdringä. Es isch e recht ruhichi Fahrd, wo mor neddso genau waijhs, wiemors oisordierä soll.

Enn Eschdringä gibt’s bei de Traudl zum Dahg der Weissworschd e bissl zu wenich defuh… s’neggschd‘ Johr derfä des e paar mehnor Peerlin soi, Holger, unn mior erfahrä, das d’Petra morjeds em Lars niwwor ruft, unn dassor donn schdeehd! Also de Lars. Also de kloonä Lars… also… em allorliebschdä deedi den Dialog gern aus moim Kopf schdreichä!

Weil’s uff de Terrass so schee isch, vorbummlämor uns, schbiele uff vor dä Rainor unn donn missä mor uns e bissl schbuuhdä, dassmor en’d Uffstellung kummä. Dort isch die Zeidd e bissl knapps, so knapp, dass ich moi longjährichä Tradition en de Eeschdringor Uffstellung abkärzä muss – unn trotzdem zu schbohd kumm. Unn midd mir de Schbeidor unn de Adi. Dongschee onn Eich all, dassdor’d Inschdrumende middgschlaijfd hedd! Do muss ah noch was kummä, des isch klar! Do wärd ah noch was kummä…

De Umzug selwor isch donn Kranaadä! Mior schbiele unns d’Fliggl ford unn Bleeslin no! Unn weil’s nedd gnug isch, heerämor a nedd uff, alsmor bei de Wiggor-Waggor vorbeilaafä unn a nedd, alsmor em Parrigblatz ohkummä. De Freeed ruff unn nunnor! A propos nunnor: so ziemlich mehwiedie Helfd fährt uffem Bodde rum. De Lars haud vor lauder Fraijd soin Schdegge de Birrigidd, derrä Armä, ens Gsichd unn de-noohch fiehltor sich wie uffem Fischmarkt. Do heddor mor faschd leid geduh, der arm Kerl!

Ohweds gibt’s donn Flaaijsch beim Damir unn donn gejemor Schlumblä. Des isch ohfongs nedd so, schdeigerd sich awwor bis zum Robert. Unn wer on dem Ohwed bezahlt hodd, isch selwor schuld.

Sunndahgs treffemor uns em Herzdormel Caahschdl. Akkordschmingä vunn de Petra unn Mauldeschlin, vunn dennä de Bernhard bschdimmd noch bis enn di onnor Woch hodd.

Emm Bus diskudierä d’Katrin unn de Inge, wer heidd Getränkemuschi soi wärdd, awwor entschiedä hennsesich do noch nedd.

Donn hemmor en Hölläumzug en Dorlach! Sensationell! Hambrigge… wu?

Minneschdens e halwi Million Menschä wahrä dort en Durlach uff de Gass unn waarä vun uns begeischdord! Mir waarä awwor aah guhd! Sogar gedonzd hodd unsor Gebläs! Bis uff de Klaus, der des Gehops in soinorä charmente Art kommentiert hodd midd: „Ha wenn i hädd donzä wollä, wääri zu de Gardä gongä!“

Donn hodd’s dort noch oi Saubleedi ghadd, die midd ihräm Pöscho em Gejevorkehr enn de Umzugsschdregg unnorwegs isch! Gut, die hodd sich beim Nausfahrä bschdimmd arrig iwwor die Erfurchtsbekundungä unn Begeischdorung gfraijt unn sich bschdimmd aah iwworhaupt garnedd gschemmd, die Saaichorn!

Donn fahrämor zum Baumonn… wu’s aah oifach Hommor isch! Mo konn’s nedd bessor saachä! Ah weje uns fliegd’di Hall unn all die dort sinn – egal ob’s d‘ Herzdohme senn, de KHC, die KiKaGe oder wer aah immor isch – alle feijorä midd uns midd unn mir henn e richdisch scheens Feschd beim Hoinz enn de Hall‘!

Em Hoinz selwor hodd’s ah gfallä; so guhhd, dassor uns vors neggschd‘ Johr ah diregd widdor oiglaadä hodd!

De Lars hodd gmohnd, dassor schu friejor hoohm gongä wär, wonn’s koi Jacky gewwe hedd. So henn de Lars unn de Patrick em Baumonn d’Hall abgschlossä, senn mit de Herzdohm em Reje hohmgrennd unn henn noch’s Pavillon abgebaut. Lars – 8 Dahg senn a schu rum, jetzt wärds eng vordi!

Em Rosemontag wärrä korz nochdä Sechsä schu die erschde Links mit Bilder und Videos vunn Durlach vorschiggd.

Abem halwor zehnä Schmingä bei Dörrs en de alde Blumerei midd Schnizzl unn Buleddä!

De Bernhard, s’Merx ihren, kummd uns em 12 abholä unn mir missä ohne ‚d Stadt-Fitch loos, weil die enn de Schdadt noch’s volle Progromm hodd…

Die kummd noochgfaahrä un londt genau richtich, so dassmor uns all zommä ennd‘ Uffstellung machä.

Em Umzug renne e paar Fitches durch uns durch, die werrä awwor sowas vunn en de Sengl gschdeld, dassdsie wahrschoinds heid noch koi Wassor gewe…

Nochem Umzug krieje die Schnappsegg ’s beschde Schlagwerk, wasdsie jemols hawwä werrä, alsmor zommä de Guggemarsch gschbield henn. Des war a richdich schee! Dongschee nooch Kerrloch zu den Schnappsegg!

Donn laafämor enn de Bus, widdor middem Guggemarsch. Unn als ab und oh ohnor uffheerrä will, kumm’d Ohsag vum Ärschde: gschbield wärrd bis zum Bus!

Die Hohmfahrd war a dodahl subbor, inkl. Indoor-Happening em Bernhard soim Bus drin.

Vorrem Da Sofia scheisst de Herzdohmedormel bevormor essä mol noch schnell enn alle vier Himmelsrichdungä, unn donn henn ohweds d’Katrin un de Uwäää richdich Schbass zommä beim Schlumblä.

De Schbeidor kummt donn erschd schbohd en de Wissädälor Hof, als die meischdä onnorä schu dehohm senn… die vorbassä all ’s Fussballschbiel zwischem Lars (Anm. d. Verf.: korrekterweise war’s de Uwääää – so isch des halt middem Heeräsaagä) unnem Patrick mit de Selina als Ball…

Em Dienschdahg isch em 11ä Dreffpungd bei Sälzlors dehohm unn – Jesses – ’s gibbd widdor Vorheijoddä unn die weltbeschd Keessubb! Dongschee, Fritz unn Silvia!

Onndä Uffstellung rejjords mol widdor. Awwor hey: mir senn jo koi Scheeweddorfasenachdor! Also, des kemma schu ah, awwor e paar hunnord Liddor Niederschlag, was machd uns des bissl Wassor schu!? Kemmor jo schu vunn Odenä, wumor vor Joohre schun unsor Seepferdlabzaaichä gmachd henn…

Unsor Herzdohm fährd on uns vorbei unn mir scherrä uff de 22 oi. De Umzug leeft guhd, mehrfach liejä unsor Trompeedä uff de Gass, am liebschde vorrem Ama, wu mor vum beschde Wärd vunn Wissädal, em Robert vum Wissädälor Hof, mit Slivo versorgt wärrä. Demm hodd’s neemlich aa gfallä, a wonnor weje unsorm Uffdridd Ärjor middä Nochbor griegd hodd! Awwor: egal!

Donn gehds end Hall unn mir schbiele unsorn ledschde Ufftritt.

Donn noch e Byebye unn’d Inschdrumende fort unn zu de Gertrud, wo die Nudel unn’d Bolo-Soohs schun uff uns wardä… Dongschee, Selina unn Birrrigidd!

Em Schluss schbield de Pelzor en de Kellorbar de Iron Maiden, dassmors wenigschdens oimohl on dem Dahg gheerd henn.

Unn donn wie’s de Adi gsahd hodd: hohm, kaggä, duschä!

E paar henns gonz onnorschd awwor doch ähnlich gmachd, die senn hohm, rabblä, Zeehbudsä.

E paar onnorä waarä noch uff de Gass unn henn quasi live miterlebt, wie die Fasenachd ihren ledschdä Schnaufor gmacht hodd!

Desweje erheebt Euch jetzt bitte, unn gedengd middmior in Schdillä unsorä Fasenacht 2020!

Stille

Liewi Fasenachd, mir werrä dor mindeschdens oihj Johr long gedengä unn uns gern on Dich erinnerä!

Unn jezzord erhebt Eijor Glässor, schdohsd midd mir uff e tolle Kampagne 2019/2020 unn unsor Fasenachd oh, die mor zommä ghadd henn.

Prost, uff dich, unsor Fasenachd!

Lied

So, setzt Eich biddä widdor – unn dengd droh, enn 259 Dahg isch de 11.11., in wenicher als oim Johr, en genau 357 Dahg isch schu widdor de Schmuzzich unn mir senn vor denn Dahg dong unsorä Weltklasse-Organisatorin a schu widdor mehrfach gebucht!

Enn de neggschde Wochä sohldämor uns droh mache, neije Liedor oizuschbiele, jezzord wu’d Libbä unn Äärm Kraft henn wie sunschd nie unnorm Johr…

Unsorn neggschde Ufftritt hemmor enn e paar Dahg, bis dort no erholt Eich guhd unn guggd, dassdor Eijor Klamoddä unn a Eijor Wohnungä oinichermaahsä sauworbringd.

Unn nedd ärjerä lossä, wonndor bis Oschdorn noch Konfetti, Droggäfarb oddor Kleidungsschdigg find, die e bissl schmaggä. Wiedor jo all wissd, isch des normal nooch Fasenacht.

Awwor es isch’s jedes Johr a widdor wert!

Unsor Ordänsvorleijung fälld desjor aus, weil sich iwworraschenderweis niemand so richdich qualifiziord hodd! Des war me so e generelles Snickers-Mimimi! Wie so en Orddä ausseje deehd, kenndor Eich bschdimmd all vorschdelle, awwor weil‘d Faschdäzeidd isch, gibd’s do heidd kooni… DES isch rum!

Übrigens: Bildor unn Videos wärrämor die neggschde Wochä vereffendlichä, wiedor semor zur Verfügung schdelld… do schicki noch was on all iwwor unsor Grubb.

Tja, unn jezzord bleibdmor blohs noch, Eich all zu winschä, dassdor schnell wieder enn’d Normalität kummt, aah wonn’s e bissl weh dudd… awwor a des gheerd wie jedes Johr aah oifach dezu!

Mir seje uns enn de neggschde Brohb en ohnorä Woch unn bis dord no: sauwor werrä unn sauwor bleiwä, macht’s guuhd unn bis donn!