Unsor liewor, troijor Wegbegleider uff sechs Räddor,
es fühlt sich faschd surreal oh, do zu sizzä unn die Zeilä doh on dich zu richdä!
Wer heddehmol gedengd, dass Metall, Glas unn Gummi errä gonzä Guggemusich so ons Härz wachsä kennä?
Awwor du wahrsch nie oifach nur e Fahrzeig!
Du warsch unsor rollendes Clubhoim, unsor Tuuhrbus und unsor schallisolierdor Bunggor nooch de wildeschde Uffdriddä.
Zommä hemmor alles erleebt, was die Fasenachd ausmachd: des klirrende Eis vunn Fasenachts-Windormorjedä, erschöpfde Fudiggl nooch longä Ufdriddä unn schiefä Täähn, wemmor mohl widdor gsungä oddor sogar midd unsorä Inschdrumendä en doim Innäraum gschbield henn.
Alles hosch du klaglos weggschdeggd. Sogar Hektoliddor verschütteter Geträngä, hoffnungsloose Turnversuche unn Tonnä vunn Biordeggel, Sektkorkä unn Geträngebeschor!
Wie offd hosch du uns sichor hohmgebrochd, währendmor em Gong noch die ledschdä schiefä Liedor ohgschdimmd henn?
Doin Innäraum hodd Dinge gseje, die koin Beichdschduhl je erfahrä wärdd: Der intensive, awwor befriedigende Duft vunn Schwahijß nach harddä awwor tollä Uffdriddä, liddorweise Pfeffi in jedorä Ridds unn des ewichä Tetris-Schbiel, wennmor versuuchd henn, unsore Inschdrumende unn unsor Wäjeli irgendwie in doin Bauch zu quetschä.
Unvorgesse bleiwwä die Momende, in denne du vor Schweiß unn Euphorie vunn innä bschlagä warsch, weilmor uns nooch unsorä Uffdridd selwor gfeierd unn lauthals gegröld henn. Oddor ah die legendärä Erlebnisse midd dior – beischbielsweis als Du de Zeiddornor Bohiwworgong quasi dauerhaft unbenutzbar gmachd hosch!
Heidd drennä sich unsor Weje. Es isch Zeidd for dich, neijä Schdrohsä unn Weje zu erkundä – hoffendlich irgendwo, wu’s e bissl ruichor zugeht als bei uns. Mir klopfä dir e ledsches Mol uff de Sessel unn uffs Ammaduhräbredd – e schdilles „Dongschee“ vunn uns allänä forr jeden Kilomeedor unn jedes Mohl, wu du uns sichor choffijord hosch.
Hoch die Tassä! Uff unsorn Tuuhrbus!
Möge der Asphalt unnor doinä Rahijfä immor griffich unn doin Tonk – unn a die Bordbar – niemols gonz leer soi.
Mach’s guuhd, aldor Freund unn guuhdi Fahrt!
Dior unn Bernhard e digges Dongschee unn vun uns e Woghaislä… Fudiggl! Woghaislä… Fudiggl! Woghaislä… Fudiggl!
Wonn mor ausglaadä henn, schdellämor draussä bidde allä e Schbalior, wonn sich unsor Bus uff soin ledschde Weeg als Bernhards Bus machd! Mior wollä eich beidä donn entschbrechend verabschiedä unn des ah uff Instagram powschdä!
Wiesental, am 17.2.2026 a.D.
